Welcome to the Events listings for the Pontardawe Arts Centre Simply choose an event from the list below or select a date to view. You can also use the category facility below to filter by category.
What’s On
Notice/Hysbysiad:
Annwyl pawb,
|
Mae gyda ni gymaint i’w ddweud, er bod pethau’n dal i fod yn dawel iawn ar hyn o bryd yn niwydiant y Celfyddydau ac yng Nghanolfan y Celfyddydau. Serch hynny, ar ôl cyfarfodydd tîm wythnosol di-rif ar-lein mae ein cynlluniau ar gyfer gweithgareddau gweddill y flwyddyn yn dechrau toddi’n un.
Mae’r rhan fwyaf o aelodau Tîm Canolfan y Celfyddydau yn dal i gael eu hadleoli, ond rydym yn dal i ganolbwyntio ar anghenion y safle. Ond gan fod pedwar aelod o’n staff yn gweithio ar y timau Profi, Ôl-rhain, Diogelu; un wedi’i secondio i dîm cyfathrebiad corfforaethol y Cyngor; ac un yn gweithredu gyda’n cydweithwyr ni ym Mharc Gwledig Margam, ’dyw hi ddim wedi bod yn hawdd inni gael amser i symud ymlaen fel tîm.
Ond chwarae teg, dyn ni wedi gwneud ein gorau glas i gadw mewn cysylltiad a chwrdd ar-lein yn rheolaidd er mwyn dal yn gyfwastad â datblygiadau newydd a pharhau i rannu syniadau creadigol.
Yn anffodus, mae problemau personol wedi codi i rai ohonom ar adeg pan mae pethau’n eithaf anodd inni i gyd. Mae hyn, ar ben seibiant yr haf, wedi peri oediad yn ein negeseuon marchnata wythnosol a hoffen ni ymddiheuro am hynny. Ond teimlwn er gwaethaf popeth taw dyma’r amser delfrydol inni ymdrechu eto i ymestyn allan tuag at ein noddwyr, ein cefnogwyr a’n cwsmeriaid.
Er i’r cyfnod clo ddod i ben, dyn ni’n deall ymateb gochelgar llawer o bobl rhag ofn y gwelir ail don yn ymddangos yn y man. Ond wedi dweud hynny, mae’r cyhoedd yn disgwyl, fel ninnau yma yng Nghanolfan y Celfyddydau, i bethau ddechrau symud drachefn.
Rydym wedi clywed dymuniad a gobeithion llawer ohonoch y bydd yr adeilad yn ail-agor ar gyfer dosbarthiadau, ffilmiau a digwyddiadau lle gall pobl gadw pellter cymdeithasol. Yn anffodus, er mor awyddus ydyn ni i ddatgan dyddiad ail-agor pendant, mae’n amhosibl inni wneud hyn oherwydd natur anghyson y sefyllfa gyflym newidiol ynghylch Cofid-19.
Ond gallwn ni eich hysbysu am y cynllun sydd gan Gyngor Castell Nedd Port Talbot i ail-agor yr adeilad fesul cam i’r cyhoedd:
| CAM UN |
| Ail-lenwi Canolfan Celfyddydau Pontardawe â staff sgerbwd – sef y rhai nad ydynt wedi cael eu hadleoli ac a ystyrir yn hanfodol bwysig o safbwynt gwaith cynnal a chadw, Iechyd a Diogelwch, gweinyddiaeth a pharhad gwasanaethau. |
| Parheir i ddarparu gwasanaethau yn ystod y cyfnod hwn – ebyst wythnosol a chyfathrebu ar gyfryngau cymdeithasol – rheoli’r rhaglen newidiol wrth i ddigwyddiadau gael eu trosglwyddo, a delio â gweithgareddau ad-dalu prisiau tocynnau |
| Dechrau gwaith ar addasu’r adeilad i hyrwyddo diogelwch y staff ar ôl inni ail-agor – e.e. sgriniau, cyfarpar diogelu personél, opsiynau di-docyn, gwerthiannau heb drosglwyddo arian parod
|
| CAM DAU |
| Ail-agor ar gyfer dosbarthiadau cyfranogol gan gadw at gyngor y llywodraeth – nid y cyhoedd cyffredinol (gan hyrwyddo busnesau ein hymarferwyr) – Cynghori ymarferwyr ynghylch arferion diogel a dal yn llawn at y cyngor ynghylch cadw pellter
|
| CAM TRI |
| Ail-agor Canolfan y Celfyddydau gan gadw at gyngor y llywodraeth ynghylch dosbarthiadau, yr oriel a dangos ffilmiau a chadw pellter cymdeithasol Addasu’r oriau agor yn ôl yr angen |
| CAM PEDWAR |
| Ail-agor Canolfan y Celfyddydau ar gyfer digwyddiadau byw –gan gadw at gyngor y llywodraeth
|
Y Gyfarwyddiaeth Amgylcheddol wedi bod yn gweithio gyda Chyngor Celfyddydau Cymru ar y cynllun i adeiladu’r sinema newydd; bwriedir penodi’r cwmni pensaernïol Childs Sulzmann (www.cs-architects.co.uk) ym Mryste i ddatblygu brîff dylunio, gyda’r nod o ddechrau’r gwaith yn 2021.
Y cwbl sydd ar ôl gyda ni i’w ddweud yw ein bod ni ar ben ein digon wrth glywed a darllen geiriau caredig pobl ynghylch y Ganolfan, ac wrth ddysgu mor awyddus ydyn nhw i wybod pryd byddwn yn ei hail-agor. Fe ffarweliwn â chi am y tro gan obeithio eich bod chi i gyd yn cadw’n iach a datgan ein bod yn hiraethu am weld unwaith eto ein cynulleidfaoedd, y dysgwyr dosbarth, yr aelodau a phawb yn nheulu mawr Canolfan y Celfyddyau yr ydym i gyd yn rhan ohono.
